Lève la main avant faire takbeer tahreemah

Concernant lève la main dans takbeer tahreemah, nou ena 3 qualités hadices.

Ene hadice dire ki Rassouloullah (s.a.w) ti pé lève la main d’abord, après ça li ti pé faire takbeer.  Ene deuxième montré ki Rassouloullah (s.a.w) d’abord ti pé dire Allahou Akbar et ensuite li tipé lève so la main.  Et d’après ene troisième hadice, tout les deux ti pé faire ensemble-ensemble.  Tous les trois façons li correcte mais hadice ki montré d’abord lève la main et ensuite faire takbeer li pli authentique.  Acoze ça li pli bon faire takbeer dans ça façon-là.

"عن عبد الجبار بن وائل عن ابيه انه ابصر النبى (صلى الله عليه و سلم) حين قام الى الصلاة رفع يديه حتى كانتا بحيال منكبيه وحاذى بابهاميه اذنيه ثم كبر" (ابو داؤد)

Traduction :

“Abdul Jabbaar Bin Wa-il rapporté de so papa (Wa-il) ki li fine trouve Nabi (s.a.w) au moment ki li ti pé diboute pou namaz, lève so deux la main ziska ça ti pé vine même hauteur avec so deux z’épaules et li ti pé faire so deux pouces vine même hauteur avec so deux zoreilles et après ça li ti pé faire takbeer.” (Abou Dawood)

Position hadice :-

Ça hadice-là li ene hadice منقطع (mounqati) parceki Abdul Jabbaar pas fine tendé avec so papa Wa-il t. Malgré ça, li ene hadice ki capave considéré parceki انقطاع (disconnection) dans sanad de la part banne narrateurs dans خير القرون (les meilleures époques) li pas ene défaut ki affaibli ene hadice.

Hadice Abdullah Bin ‘Oumar (r.a)

"كان رسول الله (صلى الله عليه و سلم) اذا قام للصلاة رفع يديه حتى تكونا بحذو منكبيه ثم كبر" (مسلم)

Traduction :-

“Quand Rassouloullah (s,a,w) ti pé diboute pou namaz, li ti pé lève so deux la main (à ene hauteur) ziska ça vine lors même niveau avec so deux z’épaules et ensuite li ti pé faire takbeer.” (Mouslim)

Remarque: 

D’après ça hadice-là, Rassouloullah (s.a.w) ti pé dire Allahou Akbar après avoir lève la main.

Hadice Abou Houmaid t

"كان رسول الله (صلى الله عليه و سلم) اذا قام الى الصلاة اعتدل قائما ورفع يديه ثم قال الله اكبر" (الترمذى)

Traduction :-

“Quand Rassouloullah (s.a.w) ti pé diboute pou namaz, li ti pé dresse li droite, et li ti pé lève so deux la main et après ça li ti pé dire Allahou Akbar.” (Tirmizi)

Position hadice :-

C’est ene hadice ki qualifié de حسن (bon) et صحيح (authentique) par Imam Tirmizi.  Imam Ibn Khuzaimah et Ibn Hibbaan aussi fine qualifié li de ene hadice Saheeh. Ça hadice-là li trouve dans Sounan Ibn Majah aussi.

Explication :

D’après ça banne hadices-là, Rassouloullah (s.a.w) d’abord ti pé lève so deux la main et après ça li ti pé dire Allahou Akbar.

Selon ene hadice dans Abou Dawood et Al-Baihaqui, Rassouloullah (s.a.w) ti pé lève la main et dire Allahou Akbar tous les deux ensemble. Et d’après ene hadice dans Sounan Ad-Darqutni, Rassouloullah r ti pé fini dire Allahou Akbar avant li lève so deux la main.  Tous les trois façons faire takbeer fine rapporté.  Acoze ça tous les trois façons li permette, mais li pli préférable faire li dans la première façon, c’est à dire d’abord lève la main et ensuite dire Allahou Akbar, parceki ça façon-là fine rapporté par banne hadices ki pli authentiques.

Takbeer-ut-Tahreemah

عن على (رضي الله عنه) عن النبى ( صلى الله عليه وسلم) قال:

"مفتاح الصلاة الطهور وتحريمها التكبير وتحليلها التسليم" (الترمذى)

Traduction:

Rapporté par Hazrat Ali (r.a) ki Nabi (Sallallaahu alaihi wasallam) fine dire:

“La clé namaz c’est la propreté. So “Tahreema” c’est Takbeer (dire Allahou Ackbar) et so “Tahleel” (façon pou sorte en dehors namaz) c’est faire salaam” (Tirmizi)

Position hadice :

Imam Tirmizi fine qualifié ça hadice-là de meilleur hadice ki fine être rapporté lors ça sujet-là. Sans situé la position de ça hadice-là, li bon nou conné meilleur hadice pas nécessairement signifié ki hadice-là li bon et correcte dans li même. Parceki meilleur li ene kitchose relatif. Li capave bon par rapport à lezot et en même temps li capave pas bon en li même. Ça nou fine mentionne ça comme ene principe seulement sans dire quelque chose lors ça hadice-là.

Ena ene rawi nommé Abdullah Bin Mohammad Bin Aqeel ki trouve dans so sanad. Ena banne savants ki fine mette li en question concernant so mémoire. Mais d’après Imam Boukhari, banne savants de hadice couma Imam Ahmad Bin Hambal (R), Ishaaq Bin Ibraheem et Al-Houmaidi, zotte fine considère hadice Abdullah Bin Mohammad Bin Aqeel comme ene “hujjah” (preuve). Et quant à Imam Boukhari, li même personnellement, li considère Abdullah Bin Mohammad Bin Aqeel comme ene narrateur passable. Donc tous ça là donne raison à banne ki considère li ene hadice authentique couma Al-Haakim et Ibn-us-Sakan.

Explication :

مفتاح veut dire la clé. Tanque perna la clé, pas capave ouvert la porte. La porte li ene moyen pou gagne l’accès dans la caze. Dans ça hadice-là, Rassouloullah r fine compare namaz avec ene la caze. Couma là-bas pas capave gagne l’accès dans la caze sans ki ena la clé dans la main, ici aussi pas capave rente dans namaz sans ki ena tahaarat (propreté). Tahaarat li représente pou namaz ceki ene la clé li représenté pou ene la caze. Alors la clé namaz c’est tahaarat. Sans tahaarat, ene dimoune pas capave rente dans namaz.

Tahreem signifié faire ene kitchose ki halaal et permette vine haraam. Banne actions couma mangé, boire, rié causé, viré tourné etc. c’est banne kitchoses ki zotte permette en dehors namaz mais pas gagne droit faire tout ça là quand ene dimoune fine rente dans namaz. Alors bizin conné apartir quand ki ça banne kitchoses-là pas gagne droit faire.

Donc le hadice pé montré ki le tahreem ou bien ça point acote ene dimoune so namaz li commencé, c’est ça moment quand li faire takbeer (dire Allahou Ackbar). Et apartir ça moment-là même, tout ça banne kitchoses-là vine haraam.

Coumsa même Tahleel veut dire faire ene kitchose interdit vine halaal. Banne actions couma mangé boire rié causé ki ti interdit dans namaz, revine halaal apartir ene certaine point. D’après le hadice, Tahleel ou bien ça point acote  banne kitchoses ki ti interdit dans namaz revine halaal c’est quand le mouswalli li faire salaam.

Donc d’après ça hadice-là, namaz li commencé par dire Allahou Ackbar ki nou appelle Takbeer Tahreemah et li terminé par faire salaam. Sans Takbeer namaz pas capave commencé. Ça veut dire ki Takbeer Tahreemah li indispensable et faraz ou obligatoire dans namaz.

D’après principe, Takbeer Tahreemah et salaam dans namaz, tous les deux ti bizin wajib. C'est-à-dire ene ti degré moins ki faraz. Parceki ça hadice-là li ene خبر الواحد. Ene hadice de ene telle catégorie li ene hadice ki ظنى الثبوت ou bien ki so source li pas ene source catégorique. Et ene hadice pareille pas capave servi li pou prouve ene kitchose faraz. Mais malgré ça, Takbeer Tahreemah li considéré comme faraz. Cela acoze ki li bénéficié l’appuye de l’Ijma. Ene hadice ki bénéficié l’appuye de l’Ijma, li vine assez fort et solide ki permette li servi pou prouve ene kitchose faraz. Salaam dans namaz pas fine bénéficié ça genre de l’appuye-là, acoze ça li continué reste waajib seulement.

Donc ene dimoune pas capave rente dans namaz sans faire takbeer. Li bizin absolument faire takbeer pou so namaz commencé. Par contre, pas bizin absolument faire salaam pou termine namaz. Ene dimoune ena la possibilité termine so namaz par ene l’autre moyen aussi. Si après avoir accomplir tous banne kitchoses ki faraz dans namaz, ene mouswalli necque li levé, li allé ou bien li commence mangé boire ou bien li riyé causé, alors dans ça banne cas-là, so namaz pou terminé mais li pou termine dans ene façon indésirable avec ene manquement, acoze ki li pas fine termine li avec salaam. Pou répare ça manquement-là, li bizin refaire ça namaz-là.

l'Importance Namaaz