Ziska ki hauteur bizin lève la main au moment de takbeer Tahreemah?

"ان عبد الله بن عمر قال رأيت النبى صلى الله عليه وسلم افتتح التكبير فى الصلاة فرفع يديه حين يكبر حتى يجعلهما حذو منكبيه ..." (البخارى)

Traduction :

“Hazrat Abdullah Bin Umar (r.a) fine dire : “Mo fine trouve Nabi  (s.a.w) commence takbeer dans namaz.  Alors li fine lève so deux la main au moment ki li fine faire takbeer ziska ki li fine faire li vine dans hauteur so deux z’épaules…” (Saheeh Boukhari)

Explication :

D’après ça hadice-là, Rassouloullah (s.a.w) ti pé lève so la main ziska so z’épaule. D’après ene hadice dans Saheeh Mouslim, Hazrat Malik Bin Al-Houwairith t dire :

"ان رسول الله صلى الله عليه وسلم كان اذا كبر رفع يديه حتى يحاذى بهما اذنيه ..." (مسلم)

“Quand Rassouloullah (s.a.w) ti pé faire takbeer, li ti pé lève so deux la main ziska ki li ti pé mette zotte dans même hauteur avec so deux zoreilles. ” (Mouslim)

Selon ene l’autre version dans Saheeh Mouslim même, Rassouloullah (s.a.w) ti pé lève so deux la main:

"حتى يحاذى بهما فروع اذنيه"

“Ziska ki li ti pé lève zotte dans même hauteur avec la partie supérieure de so zoreille.”

Là nou fine gagne deux façons lève la main :

1.     Ziska zépaule

2.     Ziska zoreille

Tous les deux hadices Saheeh (authentique). Donc tous les deux pratiques aussi bizin correcte. A moins nou dire ki ene fine abroge so camarade mais perna aukene preuve pou soutenir ça thèse-là. 

Ena ene l’autre possibilité ki tous les deux capave ene seul kitchose mais ki fine être interprété différemment. C'est-à-dire ene narrateur fine trouve li dans même hauteur avec zépaules par certaine rapport et l’autre narrateur fine trouve li dans même hauteur avec zoreille par ene certaine façon. Ça possibilité-là li paraite pli correcte à la lumière ene hadice rapporté par Hazrat Wa-il (r.a) dans Abou Dawood ki dire :

"انه ابصر النبى صلى الله عليه وسلم حين قام الى الصلاة رفع يديه حتى كانتا بحيال منكبيه وحاذى بابهاميه اذنيه ثم كبر" (ابو داؤد)

Traduction :-

“Li fine trouve Nabi (s.a.w) au moment ki li fine diboute pou namaz, lève so deux la main ziska ça fine vine dans même hauteur avec so deux zépaules et li fine mette so deux pouces dans même hauteur avec so deux zoreilles. Et ensuite li fine faire takbeer.” Abou Dawood

Nou ena ene l’autre hadice dans Abou Dawood ki Hazrat Wa-il t fine dire :

"رأيت رسول الله صلى الله عليه وسلم يرفع ابهاميه فى الصلاة الى شحمة اذنيه" (ابو داؤد)

Traduction :-

“Mo fine trouve Rassouloullah (s.a.w) lève so deux pouces dans namaz ziska so boute zoreille.” (Abou Dawood)

L’idée globale ki capave déduire apartir banne différent hadice ki fine cité, ki Rassouloullah (s.a.w) ti pé lève so la main en sorte ki so poignet ti dans hauteur so zépaule, so pouce ti parallèle avec so boute zoreille et lezot banne le doigts ti batte dans même hauteur avec la partie supérieure de so zoreille. Dans ça façon-là aukene hadice na pas contredire so camarade.

N.B :- Comme principe tanque capave bizin interprète banne différent hadice dans ene façon ki ene pas contredire l’autre et tanque capave bizin mette en pratique différent hadice au lieu prend ene et quitte l’autre. Dans la façon ki fine interprète banne différent hadice concernant hauteur ki bizin lève la main, li vine possible pou mette en pratique tous banne hadice sans néglige kit hadice là-dans. Ça li meilleur ki prend ene et quitte ene.